This page is intended for users in Hong Kong(Chinese (Traditional)). Go to the page for users in United States.

Boxful:成間公司都唔悶得?

撰文:Wantedly編集部

相信大家有冇用過Boxful都好,都一定會聽過佢哋,或者見到最近一系列嘅地鐵廣告。今次筆者就約咗成村「Boxer」嚟傾吓偈,睇吓佢哋平時究竟搞邊科!

欸,喺同佢哋吹水之前,都要畀大家知道吓Boxful做咩嘅。迷你倉相信大家都聽唔少,而Boxful就係睇準呢個行業有咁多嘅發展空間,所以就決定成為「迷你倉2.0」,將成件事變得更靈活。你只係需要將所有嘢掉哂落佢哋畀你嘅箱,佢哋就會成箱幫你拎走,連行出門口嘅必要都冇,而你畀嘅月租都只係「段」箱計,簡單啲講:平、靚、正。

▲ Stefanie Chow — Deputy General Manager(照片由Boxful提供)

做主管先要夠「貼地」

讀business出身、做過大大小小嘅上市公司、仲要係亞太區嘅director,Stefanie本來就已經可以舒舒服服咁過埋下半世,因咩事會嚟咗Boxful呢?佢笑住咁話:「真係好悶,悶到頂唔順。」

「之前做過嘅公司業務唔係太創新,又主要serve啲corporate,basically每日、每個月、甚至每一季都差唔多,重重覆覆咁做同一堆嘢,但我想做啲會直接影響到呢個社會嘅嘢,而唔係每日都返工放工,然後就等出糧。」所以Stefanie轉工嘅時候都好有方向㗎:「因為我知自己想做b2c、細公司、掂廣泛嘅內部responsibilities,嗰陣時咁啱見到Boxful又請緊GM,呢份工又滿足到所有條件,於是就apply咗。」

作為Boxful嘅「第二把交椅」,Stefanie最想就係接觸到每一個人,知道哂一班同事諗啲咩、覺得公司應該點樣做好啲,再盡快實行同事提出嘅建議:

「喺大公司做嗰陣,啲意見好難上到去老闆度,老闆又唔會太理你哋咩感受,只要公司正常運作就冇問題,因為我試過所以更加唔會畀自己都係咁。」

所以Stefanie會定期同所有同事都做1-on-1 meeting之餘,仲會落倉同前線嘅同事傾偈同打氣,最緊要係get her hands dirty,做一個「貼地」嘅上司。(聽講佢仲記低哂所有人嘅生日,準備啲驚喜畀每個同事)

▲ 聽啲大粒嘢講咗咁耐,聽吓啲細嘅點講先!(左至右:Tiffany Lam – Marketing Associate、Jay Ng – Senior Web Developer、City Law – Customer Service Officer)

「好似返返去讀書嗰陣咁」

大家見到嘅呢三位「小薯」都有唔同嘅背景:做開startup嘅City、初出茅蘆嘅Tiffany、搞過startup嘅Jay,咁佢哋覺得Boxful有咩咁特別呢?

雖然City嘅上一間公司都係startup,但佢就覺得Boxful嘅communication好好多:「呢邊好重視一班同事,會花好多時間搞唔同嘅event畀大家玩,team building又好、happy friday又好、中秋節一齊整月餅都好,所以無論係marketing、CS、IT定係logistics team,成間公司都會好friend好close。」

所以阿Jay都覺得成間公司嘅structure好flat:「我仲記得嗰陣見完Boxful已經有其他offer喺手,但我真係想入嚟呢度多啲,第日就email畀老闆,然後隔一日Norman就已經打電話畀offer我,講緊嗰日係星期日嚟,我做咗咁多年嘢都未見過weekend會打電話畀offer人嘅老闆。」

咁由大公司轉去startup嘅Tiffany又點睇呢?

「成班同事都好似同學咁,好多嘢傾同講,同埋呢度真係好緊張班員工,我初初嚟『in』都唔知自己想做啲咩,但Norman (Co-Founder & CEO)見到我有自己website,整好多content,就問我有冇興趣做marketing,真係幫我諗埋條路可以點行。」

▲ Norman Cheung — Co-Founder & CEO(照片由Boxful提供)

個個都可以做Startup?

既然講到Norman咁好,佢請人嘅準則又係點呢?Norman就話最緊要只係得兩樣嘢:「Boxful而家請嘅人一定要夠curious同埋positive,因為作為一間startup,我哋每日都面對緊好多challenge,而我哋同時間做緊嘅就係challenge緊傳統行業,不斷諗點樣做好啲,所以呢兩個quality好緊要。」

雖然startup聽落係好好玩、好有挑戰性,但startup都總有伏㗎嘛,Norman就畀咗啲tips大家:

「最緊要係你相信間公司嘅product,如果連你都唔覺得個product或者business model係好嘅,你自己返呢份工都唔會投入。」

當你真係覺得間公司係work嘅時候,Norman就覺得其次係啲人:「通常一間startup唔會有太多staff,個個都『朝見口,晚見面』,如果你同啲同事唔夾嘅話,返工就會好辛苦。」筆者好奇問,如果唔係想join startup,但係自己搞一間startup又應該點?

「要做好心理準備,你要預咗自己畀好大嘅commitment,講緊係一個星期7日都會畀哂間公司。其次就要搵多啲startup嘅founder傾吓偈,攞多啲意見,咁就可以避免好多我哋犯過嘅錯,which好多其實係啲好minor嘅錯。」

▲ Patty Lam – People & Culture Officer(照片由Boxful提供)

「最緊要大家開心!」

講到請人又點可以唔搵HR呀?Patty一畢業就已經喺大agency做咗差不多3年嘅recruitment,但就算搵得再多錢都好,都係敵唔過一個「悶」字:「嗰陣時專門係幫公司請律師,人工福利各樣係好好,但做到2、3年我就開始覺得冇咩再學,結果做得唔係咁開心之餘,又一直覺得差咁啲嘢。」

有一個咁靚仔嘅profile同background,大把公司揀啦,Boxful有咩咁吸引呀?

「其實我轉工之前已經有用開Boxful,所以本身已經對呢間公司有基本認識,覺得Boxful嘅products好幫到手。去到見工嘅時候我仲記得見咗Norman 3次,覺得佢好transparent、好誠實,第二次佢同我講而家公司有邊幾個問題,問我覺得點解決好,而唔係美化間公司。我記得嗰時完咗個interview心諗:好耐無試過覺得咁refreshing,好鍾意呢種一齊brainstorm解決問題嘅感覺。」

就係因為咁, Patty決定跳出comfort zone,成為Boxful一份子,開始建立同改革Boxful嘅culture。佢仲記得一入嚟Boxful嘅時候,公司仲未有好concrete嘅values同culture:「嗰陣大家就一齊坐低傾,唔淨止係由management去決定,係要全公司上下都同意嘅先可以,如果唔係根本就冇意思。」

唔知喺請人方面Patty又有咩見解呢?(大家準備抄notes啦)

「我盡量都唔會做phone interview,點都好我都想見咗嗰個人先,因為有啲人可能講電話個表現唔係咁好。但我都見過有啲candidates係完全唔知Boxful做咩business,一啲功課都冇做過。咁呢啲就算能力再好,我都要考慮畀唔畀佢落下一round。」

Patty覺得大家見工嘅時候,你可以唔知道自己條path想點行,但唔可能連對公司嘅基本概念同資料都唔知,因為呢個係最基本嘅尊重。

而佢每次見完candidate之後,無論最後畀唔畀offer都好,都會花時間畀返feedback佢哋,佢都想humanise成個interview process,令大家見完工之後可以拎返啲嘢走,可能係career advice,又或者係interview嘅表現,而唔係好似有啲公司咁,請人出門口就算。

筆者身邊有好多朋友都已經返工返到唔知為乜,覺得每日都好似機械人一樣。喺呢個世界,怕悶嘅人有好多,但會行第一步嘗試改變嘅人又有幾多?個機會就喺度,至於郁唔郁,就睇你自己。

後記:筆者同Norman傾偈嘅時候,膽粗粗咁問佢點解衰過一次之後,仲夠膽再搞生意,佢就咁答:「如果唔係呢個年紀創業,幾時創業?就算衰咗,最多咪做返『打工仔』,有啲嘢你唔試就成世都冇機會㗎啦。」如果係因為試過但失敗,同埋因為冇試過而後悔,唔知大家又會點揀呢?

你都想跳入個箱仔度?🤓

Boxful的招募
10 Likes
10 Likes

本週排名

展示其他排名