✨ 嚟到都係想搵份好工姐，即刻click呢度睇吓有咩啱你啦！✨

撰文：Wantedly編集部

喺呢個KOL大行其道嘅世界，相信好多marketer都唔知搵邊個合作好，而Cloudbreakr就係因為咁而誕生，想幫大小公司搵啱心水嘅influencer，用AI分析網絡上嘅潮流。今次筆者就搵嚟Cloudbreakr一班同事，拆解吓佢哋間公司背後嘅秘密。

▲ 搵班大佬嚟草皮吹吓水先啦～（圖左至右）Dexter Yin – Regional Director、Leo Siu – Co-founder & Sales Director、Rudy Chan – Co-founder & Business Development Director、Edwin Wong – Founder & CEO

一切由圖書館開始

講到創業經過，Edwin就話自己讀緊書嘅時候就已經嘗試創業：

「其實我畢業之前搞緊一間社企，嗰時發現只要有出名嘅人buy你嘅idea，喺網上好快會一呼百應，但當時市場上做social analytics嘅公司，好多都係focus喺forum同Facebook page，冇咩Influencer同內容趨勢嘅分析，於是之後就去咗間有關digital marketing嘅公司學吓嘢，上網寫吓code，過多排就喺學校圖書館開始搞Cloudbreakr。」

Edwin當年畢業前已經有好幾個人工相當唔錯嘅offer，但點解佢唔take呢？其實都係離不開Marketing成日講嘅「Create value」，所以先想搞startup，用科技創造新嘅產品，實踐自己嘅想法。

而作為佢嘅師弟，Leo就話呢4年嚟見到嘅人同事，令到佢哋成日都自稱係「創業小強」：「呢幾年我哋見到好多startup因為各種問題而做唔到落去，慶幸我哋都係pivot嘅過程中，一直反思可持續嘅商業模式，諗下點解決客戶嘅需要，喺賺錢嘅同時繼續發展自己嘅技術， 所以業務一直穩定增長同run得幾smooth。」

佢仲話最初真係幾難捱，因為有時你整咗prototype出嚟，諗住一定掂啦，點知市場唔係好buy，結果要不斷創新，好多時計劃根本趕唔上變化，唔試唔搏轉頭就輸。

▲（題外話）睇嚟加入Cloudbreakr都要返咁上下酒量先得喎～

本身已經有份高薪厚職嘅Rudy，可以話係Cloudbreakr嘅「重要拼圖」，由最初weekend幫吓手，到最後索性辭埋份工，一齊打天下：「其實自己一路都想創業，但就搵唔到個right timing去做呢件事，直至喺商會做義工認識到Edwin，就覺得係時候要離開自己個comfort zone。」

睇到呢度，大家又有冇諗過Edwin點解會召集到咁多人幫自己呢？除咗Cloudbreakr本身嘅potential之外，駐守馬來西亞嘅Dexter就話係因為Edwin個人嘅特質：「Edwin係一個“people-centric”嘅人，所以Cloudbreakr會畀好多彈性同support員工，講番我一開始入職，佢成日叫我問問題認識吓唔同嘅方向，團隊每個人都會『秒速』答我啲問題，比唔同意見我，或者好快就將需要用嘅文件send畀我。」

亦都係因為咁，喺Cloudbreakr呢3年時間裡面，離職嘅full time同事都係得一兩個，筆者聽完都覺得好勁。

▲ 係時候叫班staff去露台，靜靜雞fact check吓先！（圖左至右）：Taco、Catherine、Joanna

可以話係「要乜有乜」

當佢哋一邊飲住啤酒，一邊講呢句說話，筆者真係好羨慕佢哋，但當然佢哋做嘢都有辛苦嘅時候啦。

主要做UI/UX design嘅Taco，係一個土生土長嘅「台仔」，嚟咗香港「搏殺」已經有5年：「呢份係我喺香港嘅第二份工，Cloudbreakr好support一班同事，你只要有idea公司就會畀機會你去試，無論得唔得都冇人會話你。呢度做野雖然忙，但只要你出聲唔理老闆定同事都一定會幫手，所以喺呢度打工其實好開心。」

至於sales department嘅Catherine，原來上一份工做咗超過8年，加入Cloudbreakr嘅原因主要都係Edwin：「上一份工做到後段其實已經好悶、好攰，所以想搵另一份工『撻返著』自己，結果有個朋友就介紹咗Edwin畀我識，然後就畀佢『水』咗入嚟。」

佢覺得因為呢度嘅同事同老闆都好後生，所以大家做嘢都好有火、好認真，而老闆真係會聽你講嘢，想要啲咩support佢哋都會滿足一班同事，同佢之前做嘅傳統公司好唔同。

▲ 筆者做完訪問之後，入返office竟然見到呢個畫面，真係好「酸葡萄」…...

而負責marketing嘅Joanna最鍾意呢度夠「人人平等」，就好似上面張相咁：「喺呢度做嘢從來都唔使理title，無論你係老闆定同事，大家都係咁講嘢，唔使就住就住，只要make sense就得。你見呢度連老闆房都冇就知咩事啦。」

佢仲記得當初點解會join呢度，係因為Edwin打第一個call畀佢嘅時候，已經用咗成粒鐘去了解公司嘅background，問哂自己鍾意做啲咩，而唔係亂咁請個人返嚟。

喺而家呢個年代，莫講話好老闆，連好同事都難搵，而Cloudbreakr就好似兩樣都有齊哂。當然所有嘢都「有辣有唔辣」，但如果你試都唔試，又點知前面有啲咩等緊你？

後記：喺筆者臨走之前，Edwin話公司正積極擴展緊業務，唔理係Software Engineer、Data Scientist、Sales、Marketing定BD，不論學歷，只要你夠主動、夠醒目、肯博肯試，佢地一定唯才是用喎。佢仲約略咗介紹佢哋Cloudbreakr班同事，發現除咗local之外，呢班人分別嚟自台灣、印度、印尼、馬來西亞等等。佢話要咁樣做間公司先會夠多元化，亞洲市場好大，大家需要有更加多唔同嘅想法。筆者就好奇問句：吓，咁你咪要整好多working visa囉，唔麻煩咩？佢就笑住話：「初初都會㗎，而家都整慣哂，冇所謂啦。」

想加入Cloudbreakr？😋