1
/
5
This page is intended for users in Hong Kong(Chinese (Traditional)). Go to the page for users in United States.

梁珮珈 (Rebecca Leung):想成為一個更「好」嘅人

✨ 嚟到都係想搵份好工姐,即刻click呢度睇吓有咩啱你啦!✨

撰文:Wantedly編集部

年紀輕輕嘅梁珮珈 (Rebecca Leung) 貴為KKday嘅香港及東南亞區域總監,最近仲成為The Loop HK 30 Under 30 2019嘅一份子,喺KKday裡面可以話係「一人之下,萬人之上」。佢嘅個人經歷喺Google上面已經有N咁多個訪問提過,筆者今次就想由Rebecca個blog出發,同大家一齊了解吓佢嘅管理哲學。

管理層=「兼職社工」?

喺訪問開始之前,Rebecca提過而家嘅年輕人真係好「難搞」,包括佢自己:「而家呢個年代嘅後生仔同以前最唔同嘅地方係好『怕悶』,好多時都會追求更大嘅『成就感』,所以喺管理層面上,就好似要拉住班『馬騮』咁,令到佢哋喺可控範圍裡面有個人嘅成長。」

而當面對比自己年長嘅同事,佢就認為需要喺溝通上調節:「我覺得同年紀比較大嘅同事相處嘅時候,最緊要係start with why。同年輕嘅同事溝通可以好直接咁講自己想點,因為大家睇嘅嘢,成長嘅背景都差唔多;而同年紀比較大嘅同事就要實際好多,指出個問題再以事論事。」

其實《Start with Why》係Rebecca睇過嘅一本書,而裡面講嘅就係要由最終目的出發,繼而講點解,而唔係將自己嘅title「撻」落去,因為title對佢嚟講只係一個名義,就同社工一樣。

作為一個「打工仔」,有個好嘅上司照顧埋自己嘅情緒當然幸福,但Rebecca自己又點呢?

「出大事嘅時候梗係搵咗老闆先啦!但如果係自己有事嘅話,好多時我都會搵同期入嚟嘅同事傾;而另一個出口就係書。」佢覺得喺睇書嘅過程裡面,其實都係有人同自己傾緊偈,分別只係嗰個「人」唔喺自己面前,所以好多時Rebecca一遇到問題都會「打書釘」。

何謂「一份漂亮的成績單」?

Rebecca就覺得靚仔嘅成績表唔淨止係一份CV咁簡單,仲希望每個同事離開嗰陣都會成為一個更「好」嘅人:「而家呢個年代同以前唔同,好多人都唔會成世人打死一份工,所以我會想佢哋喺呢度有好嘅發揮,令到CV靚仔啲之餘,仲會想佢哋變得更加『好』。因為CV只係畀你搵工見工拎嚟講嘅經驗,但一個人嘅本質先係跟自己一世。」

對於Rebecca嚟講,performance同年齡一樣,只係一個「數字遊戲」。呢個商業遊戲當然要玩,但佢最緊張嘅都係同事嘅情緒同健康:

「每個人工作上都會遇到好多挫折同矛盾,尤其是我哋呢個團隊都比較後生,當佢哋做決定嘅時候,都會面對好多問題。就算最後『條數』好靚仔,如果同事嘅工作表現同mentality有好大嘅落差的話,最後只會成條team,以至成間公司都好難健康咁走落去。」佢仲話可能因為自己係過來人,所以想喺同事有困難嘅時候幫到佢哋,而自己都需要喺《理智與感情》之間遊走。

跑唔到數就畀人「捽」,performance review唔到就冇bonus,相信大家都會覺得係人之常情。但喺訪問完結之前,Rebecca就話「善良」係一個選擇,而身為一個主管,佢嘅目的只不過係想令所有同事都成為一個更好嘅人。

的而且確,好嘅上司會有好多唔同嘅風格,但筆者認為,一個好嘅上司至少會喺你有困難嘅時候扶你一把,而唔係「大石砸死蟹」。

後記:因為工作關係,Rebecca成日都要飛嚟飛去,佢就話當自己太攰唔想睇書嘅時候,仲會有一個「怪癖」──就係會喺啲嘔吐袋、餐紙上面寫字同自己傾偈,索性做埋自己嘅社工,唔知佢係咪因為睇過Malcolm X本自傳而有呢個習慣呢?

✨ 嚟到都係想搵份好工姐,即刻click呢度睇吓有咩啱你啦!✨

KKday (Hong Kong)的招募
11 Likes
11 Likes