This page is intended for users in Hong Kong(Chinese (Traditional)). Go to the page for users in United States.

補習社唔單止要摘星,更要對得住良心

撰文:Wantedly編集部

智匯教學中心(Linear and Creative Learning Center,簡稱LCLC),一見個名大家可能會諗:呿,補習社,上一頁。筆者未接觸班導師前都有先入為主嘅想法,但同佢哋傾完偈後,發覺呢間唔係一般賺錢賺到盡嘅補習社,而係講教育熱誠,對得住良心嘅非一般補習社。

▲智匯不知不覺屹立西環十二年,薄有人氣。
▲陳sir,智匯教學中心創辦人,單睇外表你勢估唔到佢細個係「曳仔」。

「如果冇遇到跑步隊阿sir,我可能行緊古惑,諗唔到係做補習」

唔好見阿陳sir「官仔骨骨」咁,原來佢以前同好多人一樣,都係唔鍾意讀書,考試幾乎「包尾」,淨係鍾意玩運動嘅中學生:「嗰陣冇乜老師關心我,除咗個跑步隊阿sir之外,去到中三嗰年佢覺得我哋(成績差嘅同學)再係咁落去,就一定升唔到大學,於是就諗方法幫我哋去讀書。」

「嗰陣每次練完田徑之後,阿sir都會捉我哋留低補習,咁大家都唔讀書㗎嘛,有咩問姐?咁咪問功課囉,每次半個鐘,但問問吓大家都開始識做啲功課,成績又有進步,有成功感就自然會畀多啲心機去讀。」

去到考公開試之前,呢位阿sir仲約哂成班學生上自己屋企溫書補習,借天台屋畀佢哋做自修室,仲煮埋嘢畀佢哋食,最後大家都如願考上大學。

一個爛玩唔讀書嘅後生仔,遇到肯幫佢免費課後補習,唔計較付出嘅阿sir,徹底改變咗佢嘅人生路向。「冇呢位啟蒙老師,我都唔會有今日。」陳sir好認真咁回答。

由孤軍作戰到遇到同路人

受呢位啟蒙老師嘅影響,陳sir讀U嗰幾年都keep住幫人「私補」,希望好似阿sir幫佢咁幫番學生,由一人私補到「蚊型」補習社,再慢慢發展到今日有兩間中心,加埋廿多名員工嘅規模,連當年嘅啟蒙老師同書友都加入埋呢個團隊,嚟緊仲會開第三間。

筆者偷偷哋八卦過學費,發現比起大型補習社,呢度收得一啲都唔平。你以為收得貴所以先做得到?錯啦,係因為遇到一班抱住同樣理念嘅同事齊上齊落,班家長感受到嘅絕對唔止係成績嘅增長,更係態度嘅改變。即使貴啲,都心甘情願意畀仔女嚟呢度補習。

▲導師分享課堂趣事,大家都忍唔住笑,有時對住啲學生真係唔知好嬲定好笑。(左起) Mavis、博士陳、Louis、Ms Kong

「我想班學生行少啲冤枉路」

人稱「博士陳」嘅嘉豪sir,拎住大大個HKU化學系PhD,明明可以教大學唔教,可以做學術研究唔做,成日都有人問佢做咩咁睇唔開嚟做補習啊?

「我係去到PhD final year嘅時候,有朋友介紹先開始私補,發覺見住啲小朋友成長嗰種感覺,係做research畀唔到我,唔淨止係成績,更可能係見到佢哋由一開始好唔鍾意讀書,去到會自己set timetable,嗰種滿足感係其他工畀唔到我。」

「我諗滿足感係其中一個因素,但更重要嘅係呢份工係對人。」出身Engine嘅Louis分享大學時做Intern嘅經歷:「你日日返到公司就係對住啲code砌model,我成日諗,唔通畢業之後我就要年復年咁做一啲就算無咗我,其他人都做到嘅嘢?」

嗰時Louis同時喺LCLC做緊part-time:「教書就唔同啦,你對住嘅係人,即使教書嘅材料差唔多,只要嗰人唔同咗,你就要換啱方法教,有趣得多。」

▲Ms Kong同Mavis講起考試Peak Season嘅日子都唔小心「激動」咗。

「為咗學生,蝕底啲又有咩所謂?邊有得吓吓計住」

一畢業就做補習嘅Mavis就坦白講,比起之前做過嘅補習社,呢度係辛苦啲,但個個導師都有心有力:

「其實每間補習社都有自己嘅文化,而呢度嘅老師就好肯陪學生一齊chur。最辛苦就係考試或者測驗高峰期,試過最長可以直落10幾日返工,星期日都要加堂。又好似之前有個中一學生,考試前四個禮拜開始溫習,到臨考前一日都仲想溫耐啲,問我可唔可以陪佢,最後嗰晚陪佢讀到11點。所以份工多少會犧牲咗陪屋企人同見friend嘅機會。」其他導師聽到後都不斷點頭,對此情此景有唔少共鳴。

Louis仲自爆自己成日唔收錢幫學生加鐘不特止,仲會兼職做埋「759」:「因為啲學生有時上堂會嗌肚餓,咁我就索性自費買零食返嚟儲糧,佢哋餓就會自己去我個位度拎。」

Mavis補充話教育係辛苦㗎啦,但當啲學生肯聽你講,你又感染到佢讀書,或者改變到佢做人,再辛苦都值得。「同學生就當然無計,人工呢啲就緊係同老細計啦!」Ms Kong講笑咁望住企喺遠處嘅陳sir。

▲LCLC會按導師、學生需要舉辦唔同活動。(上)邀請各界翹楚分享工作內容,等學生喺選科時更清楚;(中)每逢導師生日,中心都會準備蛋糕同大家一齊慶祝;(下左)開放日畀學生試玩科學活動;(下右)家長與學生一齊體驗上堂,學文言文。

「你以為做補習就淨係補習?少年,你太年輕啦!」

喺學校教過四年書嘅Ms Kong講:「你無諗過一間補習社會搞Camp、家長日、Open Day,仲試過搞職場體驗活動,我原本諗住跳出嚟補習就可以專注教學,點知都係要搞活動。」

Ms Kong講完都忍唔住反咗個白眼:「不過同學校唔同嘅係,呢度彈性大好多,真係可以因時制宜,按學生需要設計。喺學校大多數老師都係本住『可以唔改就唔改,唔好煩到我』嘅態度,要『砍掉重練』一個project係冇可能。但呢度我要考慮嘅就只有班學生buy唔buy,無固定syllabus,今年用完覺得唔work,即刻整過第二set,終於唔使再為做而做。」

▲LCLC每年暑假都會搞Camp,活動包括體能、團隊合作task、競技小遊戲同分享會,你估吓6.0件團衫輪到咩色?

教育從來都係良心事業

筆者相信,影響你深遠嘅老師真係唔多,令你印象深刻嘅就唔少,仲記得以前中學一位老師出咗名每日喺教員室煲湯。喺「香港地」,抱著「打份工啫」嘅心態似乎已經係常態。唔會諗做得好唔好,係做完已經好好;唔係諗對唔對得住自己良心,而係份糧對得住我良心。

而眼前呢班老師卻為學生默默耕耘,堅持用良心做教育。「眾人皆醉我獨醒」,佢哋想有更多嘅同路人並肩而行,睇啱就起行啦!


▲講到咁辛苦,犧牲咁多social life嘅時間,窩心嘅位都有好多嘅。嚟到訪問後嘅「曬命時間」,有做錯事之後認錯嘅「情信」,大時大節自製嘅曲奇、蛋糕呀呢啲「基本嘢」,仲有學生親手畫嘅Best Teacher Award,又有Ms Kong學生親手整嘅《江語錄》,摘錄佢上堂講嘅金句等等。筆者相信呢啲點滴就係佢哋其中一個依然堅持、熱愛教育嘅原因。

下面大把科畀你揀!💯


智匯教學中心 Linear And Creative Learning Center的招募
3 Likes
3 Likes

本週排名

展示其他排名
如果這篇文章引起了你的興趣,歡迎你到訪公司了解更多!