This page is intended for users in Hong Kong(Chinese (Traditional)). Go to the page for users in United States.

【Outward Bound 50週年鉅獻】連老公老婆都幫你搵埋!?一間改變你一世嘅公司!

撰文:Wantedly編集部

如果大家有睇過Outward Bound之前嘅訪問,相信對佢哋一啲都唔會陌生。適逢下年係佢哋喺香港成立50週年,今次佢哋就請咗一班「前朝元老」同筆者傾吓偈,講講當年嘅辛酸史!

▲咁多位前輩喺Outward Bound「浸」完之後,都撈得好掂咁喎!

「做10年都唔後悔!」

筆者見Outward Bound個campsite有好山好水之餘,又可以帶班inspire到人,入黎做都應該幾有意義同幾寫意呀,但一班前輩就話「返工邊有咁浪漫㗎!」喺度做過5年嘅Norman諗返啱啱入職嗰陣:

「以前邊有而家咁完善呀,又有training school,個senior又會帶住你教班之類。我當年入嚟上咗十幾日training就直接帶班啦,一開始好多時都係帶小朋友班,淨係諗佢哋嘅『食玩瞓』都諗爆頭。不過一路邊做邊學,慢慢就會見多好多唔同嘅人,多好多機會畀你design唔同嘅programme,無論學生到最後學到啲咩都好,最起碼你『散班』(帶完每班)嘅時候,見到有學生眼濕濕咁走,應該係感動嗰隻啩…就會覺得自己盡力做咗件好事。」

▲即刻畀啲小朋友大家睇吓先!(睇張相都知有幾耐歷史啦~)

由90年入職嘅Tommy數起,佢哋呢班人都見證咗Outward Bound呢30年嘅轉變,除咗越嚟越有系統之外,仲多咗設施、support、programme……咁付出咗10年青春畀Outward Bound嘅嘉麗又點諗呢?

「嗰陣其實好多時都想走,始終Outward Bound係我第一份工,我都想睇吓出面個世界係點,但每次當我想走嘅時候,又會有啲新嘅project同programme出嚟比我去試,結果做吓做吓就10年。」

問到嘉麗有冇覺得自己好似浪費咗10年,佢諗都唔使諗,就好斬釘截鐵咁話「冇!」:

「先唔講同事或者senior教自己嘅嘢,其實最緊要嘅係喺學生身上都學到嘢,因為佢哋可能有啲只係唔鍾意讀書,但其實做啲hands-on嘢係好叻嘅,而當我做咗咁多年,已經有個框框畀咗自己,班學生反而會教得返我,其實好多問題都唔係得一個解決方法。」

▲大家就咁睇嘉麗呢個名,係咪冇諗過佢咁型呢?

入咗嚟就跳唔返出去⁉️咪自己嚇自己啦!

講到學嘢,其實份份工都有嘢學㗎啦,但筆者同好多人一樣,都會覺得呢行咁偏門,點樣跳返出嚟做嘢呀?但實不相瞞,咁多位「前輩」離開咗Outward Bound之後都撈到風生水起(睇返上面張簡介圖都知啦),但點解可以咁犀利呢?

而家做緊corporate trainer嘅Alex話:「我嗰陣都諗過呢樣嘢,但其實喺度學得最多嘅係soft skills,而每份工都需要呢啲技能,例如你帶得多班、做得多debriefing,就會學識點對人、點同人講嘢,對自己個信心就會慢慢大咗,對我而家份工都好有幫助。」

嘉麗補充:「可能因為呢度做嘢都係對大自然,有好多變數,所以你會變得好決斷,好識得點樣執生,都學識咗為自己做既每個決定負責;唔似好多人喺大公司做嘢咁,有咩唔firm就問老闆,最緊要唔會入自己數。」

▲咁Norman作為Run for Good嘅Co-founder同CEO,又會點睇呢?(照片由Norman提供)

「無論你做咩工作都好,soft skills都係好緊要,一個人識唔識處事、解難、對人之類,Outward Bound真係幫咗我好多,如果當初我take咗第二份工嘅offer,冇入到嚟做嘅話,今日嘅我一定唔會好似而家咁。」

眼見咁多人想轉工或者轉行都好多顧慮咁,筆者就問咗咁多位前輩嘅意見,最深刻嘅就係Bacon:

「其實唔使諗得咁複雜或者考慮太多,好似我嗰陣都quit過Outward Bound去讀書啦,讀完想返嚟咪返囉。始終做嘢又唔係賣身,無論你想試啲咩都好,想做咪去馬囉,試完唔啱又或者唔得嘅話咪走。」唔知大家聽完Bacon咁講,個腦有冇「叮」咗聲呢?

▲大師兄返嚟啦!(左至右)Bacon、Tommy、Alex

「五十年不變」

當呢三位「大師兄」講到自己嘅往事,大家先發覺原來有好多嘢變咗,同時間又有啲嘢係唔會變。

曾經做過4年instructor嘅Alex,就覺得個感情同文化一直都冇變過:

「我諗個文化係以前build up到而家嘅,呢度班同事咪好似以前啲屋邨嘅鄰居咁,例如我如果趕住要帶班,但晾咗衫又撞正落雨,啲同事就會幫手收埋我啲衫,大家得閒又會一齊打吓牌、釣吓墨魚咁,就真係好似一家人咁囉。」

▲睇吓Outward Bound班「波牛」幾開心!大家又見唔見到Bacon喺邊呢?(照片由Bacon提供)

除咗呢啲「基本嘢」之外,Bacon就話:「我入嚟嗰陣冇咁多嘢玩㗎,而家又會一齊攀石、夾band之類,以前最『興』嘅咪食完lunch見仲有時間咪即刻衝去搵同事玩Winning(足球game),夜晚又一齊睇吓DVD、打麻雀,再唔係就望住個海傾吓偈咁,成件事就好似住hall咁。」

一聽到呢度,Tommy即刻補咗句:「嘩……乜你哋而家咁精彩㗎……我哋以前最多約出去行吓山㗎咋。」

▲你以為Tommy冇嘢玩咁慘?以前啲學生寫畀佢嘅journal,多到擺都擺唔哂呀!

而睇學生寫畀自己嘅journal,就成為咗Tommy其中一個娛樂:「可能因為以前科技未有咁先進啦,啲學生會好有心機咁寫一大本journal畀我,又畫畫、又曬相,當你每次帶班帶到好攰,又或者做到好頹嘅時候,佢哋就會remind你係做緊啲好有意義嘅事。」

當5日時間已經可以發生好多事嘅時候,更何況係有50年歷史既Outward Bound?但點解呢班人離開咗Outward Bound咁耐,都仲會咁記得當年嘅日子、仲可以「we connect」、甚至延續佢哋嘅《友誼之光》?或者係因為當佢哋改變學生嘅同時,Outward Bound都改變咗佢哋,成為一個更好嘅人。

後記:大家係咪發現「終身伴侶」一直都冇出現呢?是咁的,當問到咁多位喺Outward Bound得到最珍貴嘅嘢係咩嘅時候,佢哋都好認真咁講自己嘅經歷或者得著,但筆者最記得嘅係Norman笑住咁講:「最珍貴係識到我而家個老婆囉。」(聽講呢度撮合咗唔少情侶,想出pool嘅可以諗諗佢喎,但如果淨係為出pool就唔好啦……)。

(如果大家想睇返之前嘅訪問,可以click入左手邊條link喎~)

🔹 想加入Outward Bound?記住嚟1月嘅Selection Day喇!

1月12日星期六

或 1月18日星期日

Outward Bound Hong Kong的招募
4 Likes
4 Likes
如果這篇文章引起了你的興趣,歡迎你到訪公司了解更多!