1
/
5

Outward Bound:就算幾難捱都要揸緊信念!

撰文:Wantedly編集部

事隔幾個月,Wantedly再次踩入Outward Bound,突擊回訪上批Outdoor Instructor Trainee,問吓佢哋喺十日Instructor Development Course經歷咗啲咩風霜!(利申:今次Wantedly編集部準備埋採訪精華畀你,快啲睇片!)

「荒島求生記」後續

當問到嗰十日最深刻嘅經歷,六位trainees都不約而同地話:「一定係solo!」Solo 又名「野外獨處」,Solo期間佢哋係電話、手錶都無,要各自喺特定嘅spot渡過48個鐘,搞到Cookie對時間嘅概念變得好模糊:「我淨係可以靠太陽嘅方位去推斷嗰一刻係幾多點。但呢個同時係機會去整理自己嘅思緒,反思自己有咩地方可以做得更好。」

到底48個鐘無得同其他人講嘢嘅感覺係點?Berry話佢有一刻忍唔住用樹枝撩起條毛毛蟲,嘗試同佢傾計:「我同條蟲講:『嗱,如果我去完廁所返嚟你都仲喺度嘅話,不如我哋就做朋友吖!』可以想像到我嗰刻係幾想有人喺身邊陪住自己!」小編即時腦補埋經典電影《劫後餘生》主角Tom Hanks同Wilson喺荒島相處嘅點滴,成個畫面fit曬!

▲ 最後Berry返到去嘅時候已經不見蟲影。但唔緊要嘅,捱過咗solo,你嘅同伴就返曬嚟啦!

放棄定堅持就只差一線

老實講,當初聽到佢哋要接受十日「人在野」嘅洗禮嗰陣,淨係想像都覺得好hardcore。所以小編今次都忍唔住問佢哋:「喺呢十日期間有無諗過quit?」以為佢哋個個都會秒答無諗過quit咩?咁你就錯啦,有幾位trainees話腦海真係曾經浮現過呢個念頭㗎!

喺solo嘅第一晚落咗場暴雨,再加上Karen個shelter砌得唔夠穩陣,所以撇雨撇到佢全身都濕曬。Karen幾乎成晚都濕住身咁反思,甚至有少少質疑自己係咪真係ready做instructor:「嗰晚我有少少懷疑自己嘅能力,我係咪未夠好去成為instructor?」Karen話自己嗰晚就係不停問自己唔同嘅問題:「如果自己正式成為Instructor,我應該要點做先可以令participants喺課程當中學到更多嘅嘢?我又有無辦法令佢哋可以將呢啲得著,應用返喺佢哋嘅日常生活?基本上我全晚都係不停諗唔同嘅問題,諗吓自己可以點樣進步多啲,都無乜點瞓過咁滯。」

最後六位trainees都成功撐過,Charlene仲話呢啲磨煉,令佢更確信當初嚟Outward Bound嘅原因:「喺香港生活嘅節奏真係好急,平時根本連停落嚟抖吓嘅空間都未必有。過咗嗰十日之後,尤其係solo期間獨處嘅時間,都令我深信自己一直堅持嘅嘢係啱嘅,好多時都真係唔試過唔知自己有幾鍾意呢樣嘢。」

Karen話身邊嘅同伴就係佢嘅精神支柱:「就算幾辛苦都好,望望身後仲有另外五個人⋯⋯諗諗吓就唔會有quit嘅念頭!」嗚……呢句真係聽到小編骨都痺埋。雖然係肉麻㗎啦,但聽得出句句都係有血有汗。

▲ 訪問片段裡面嘅呢一幕,簡直將嗰種和睦友愛嘅關係淋漓盡致地呈現咗出嚟:「呢個係慶祝生日嘅傳統嚟㗎,而呢個傳統係由今日開始㗎!」想知佢哋有幾團結一致,就要去睇採訪精華片段喇!

「人類補完計劃」

如果trainees將體能訓練視為「肉體改造計劃」的話,咁小編會將佢哋嘅training形容為「人類補完計劃」。因為Outward Bound著重嘅遠遠不止於hard skills上嘅嘢,更重要嘅係大家點樣透過hard skills上嘅training裝備內在嘅自己!

Louis話佢哋嘅Trainer Shaik成日都講,呢度唔係Kayak School:「其實我哋嘅真正目的唔係單純教大家玩戶外運動,我哋係用呢啲教學作為工具,令佢哋學到唔同嘅soft skills,希望participants可以將從大自然嘅體驗中嘅得著,用返喺日常生活當中。」

Richard話呢度嘅training可以令佢哋嘅關係提升到另一個層次:「我哋嘅team work、大家嘅互信,呢啲都好反映到點樣用hard skills去訓練自己嘅soft skills!好記得有一晚我哋一邊行住夜山一邊傾計,大家慢慢地打開咗自己心扉咁,會互相share好多好personal嘅經歷。」Louis又話solo之後同大家圍圈一齊飲嘅嗰杯咖啡係最難忘:「嗰刻好似一個眼神又或者互相點一點頭,就已經知大家經歷咗啲咩咁,真係有種久別重逢嘅感覺,好神奇!」

做Outdoor Instructor Trainee絕對唔輕鬆,甚至用艱辛嚟形容training嘅過程都不為過。但對佢哋嚟講,呢份得來不易嘅得著係無其他嘢可以取替到!喺Training嘅過程中或者會有迷惘嘅一刻,甚至覺得終點好似好遙不可及咁。但佢哋深信揸緊個意志同信念嘅話,想要嘅結果最終都係會實現。就正如上次訪問都有提到,只要背後仲有人撐住自己,即使翻起再多風雨都總會等得到天清氣朗嘅一刻,頂住!


後記:當呢屆Training開始無耐,小編就踩入大網仔訓練基地搵六位trainees做訪問,到呢一刻佢哋就已經順利通過咗終極考驗。呢幾個月以嚟,佢哋除咗膚色一次比一次黑之外,仲睇得出佢哋由青澀變得開始成熟。但願佢哋可以keep住團火,將training學到嘅嘢帶畀將來嘅participants!
▲ 話都無咁快,佢哋嗰日已經要清返間dorm畀下一批嘅trainees。不過唔係講笑,佢哋真係越嚟越黑……

唔經唔覺就過咗半年,Outward Bound又招聘緊新一屆嘅Outdoor Instructor Trainee!不如你都踏出comfort zone,接受Outward Bound畀你嘅挑戰啦!

喺接受挑戰之前,想了解多啲Outdoor Instructor要做啲咩?12月Info Day畀機會你問到篤!

Outward Bound Hong Kong的招募
4 Likes
4 Likes
如果這篇文章引起了你的興趣,歡迎你到訪公司了解更多!