「你做咩遲咗成半粒鐘嘅？」呢個係Leah嘅職業病，又或者佢只係純粹想關心下Steven。

「哦…冇呀，遲咗收工姐。」Steven條氣都未抖順就要答第一個問題，而今晚Leah又唔知會有啲咩要問佢。

Steven成日都嫌佢太多問題，每次叫佢改，佢都當Steven係朝早九點嘅「選情告急」咁，聽完就算。

而Leah就連思考嘅氣力都慳返，因為佢永遠都係「上靶位」，職場係、情場都係：「其實我都係關心下你姐，你做咩成日都咁敏感？」

「OT你又問我點解O咁耐；難得早收工啦，你又覺得我有古怪咁，究竟你想我點呀…？」Steven終於都忍唔住話：「其實我真係好攰，不如我地算啦。」

喺呢一刻，Leah先好似真正意識到，原來選情真係會告急，而今次佢似乎會失去Steven身邊呢「關鍵一席」。

Leah一直都冇諗過自己嘅關心原來係對方嘅負擔；而Steven嘅容忍或者早就到咗極限，又或者佢根本分唔到，究竟變左嘅係Leah，定係自己，可以肯定嘅，就只係大家都冇錯。

對Steven嚟講，Leah一直以嚟所謂嘅「關心」都只係三幅被：起左身未、食左飯未、返到屋企未，心情好嗰陣可能會講多句晚安。Leah就好似不斷in緊同一個人咁永劫輪迴，連重新draft過啲問題嘅心力都冇。可能因為喺職場嘅佢，就俾人當成「的士判官」；情場上就係「審死官」。

反正每一段關係對佢嚟講，就好似重新做一個interview咁：same questions, different answers。

但今次佢唔想放棄呢個candidate：「我想改，你畀最後一次機會我好嗎？」

喺佢人生裡面，Leah第一次跌咗落「下靶位」。

「改？點改呀？你改到咩？」Steven指住Leah話。

Leah當下好嬲，一直高高在上嘅佢，從來只有佢指人、鬧人、甚至趕人走。心情好就同candidates傾多兩句；心情唔好的話劈頭就窒：「吖，乜你咁得意嘅，份份工都淨係返三個月就唔做嘅？」

而家竟然畀人用隻手指篤住個頭嚟鬧，佢覺得自己就好似《逃學威龍》入面嘅周星星俾Missy梁侮辱咁。但佢選擇左沉住道氣，因為佢知道再係咁落去，佢會失去Steven：

「你畀啲時間我，我會證明俾你睇。」

圖片來源：《志明與春嬌》

下回 ⏩

睇吓有咩好工啱你啦 👇🏼

成立於2010年，Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來，取代重視利益關係的傳統配對。在日本有超過30,000間公司使用Wantedly，每月活躍用戶達到120萬個。我們的服務已拓展至新加坡，現在更進駐香港！