喺呢一刻，Oscar忽然覺得Yoyo就好似佢平時湊開嘅客咁，時不時就會搵佢嚟出氣，而佢亦只可以低聲下氣。

佢曾經諗過能夠educate啲客，令佢地意識到自己嘅問題係邊度。但到頭來，會聽嘅只佔極少數，而佢認為Yoyo係其中一個。

「其實你有冇試過諒解我？我每日返工都已經要戴住個面具，笑面迎人之餘仲要同人𢯎水吹，我只係想收工嘅時候可以靜靜咁抖下。我知道你想關心我，想了解我平時點，但問題係，我真係冇嘢可以同你講呀…又係講啲客點樣玩嘢？老闆點樣捽我？定還是你想聽啲咩呀？」Oscar忍唔住問。

Oscar有時覺得好身不由己，賣藝還是賣身，佢根本冇得揀，因為佢需要嘅只係簽到單。但佢唔想連對住自己女朋友都要咁。

見Yoyo一直都冇講嘢，Oscar拖住咗Yoyo隻手：「你終於都明啦？其實我需要嘅只係收工之後，可以靜靜咁喺你身邊，咁就已經好足夠。」但佢冇發現嘅係，Yoyo除咗喊之外都畀唔到任何反應，又或者佢係因為委屈而失語。

佢喊得好安靜，因為抹嘅話只會出賣自己，而Oscar只會因為咁而覺得又多咗樣嘢要處理。所以佢選擇一齊望住個海。

而另一樣Oscar冇發現嘅，就係Yoyo已經冇再用力捉緊佢隻手。因為佢發現，佢嘅存在只不過係為左滿足Oscar嘅需要，而任何人都可以做到呢件事。

由收工企到而家已經十點鐘，但佢地支嘢飲幾乎冇郁過，大家都選擇咗沉默，加上喺呢個世界，又有幾多對情侶可以單靠「神交」走落去。

「Oscar，我諗得好清楚，不如我地分手啦，或者咁樣大家都會開心啲。」Yoyo話。

Oscar覺得好震驚，就好似一個同佢簽咗張大contract嘅客，忽然間同佢講：我諗我哋都係唔太適合再繼續合作落去。但佢冇任何反應，反而有啲失望，原來一路以嚟，佢認為最親近佢嘅人原來一直都唔明白佢，又有可能係佢覺得自己冇呢個條件留住佢。

曾經諗過轉「行」嘅佢，因為Yoyo嘅出現，而決定繼續做sales，因為喺香港打工，假若你唔係讀「神科」，sales就係最容易搵快錢嘅一群，佢就可以好快咁儲到一筆錢，同佢「上車」結婚，組織佢地嘅家。

但而家，Yoyo似乎畀咗佢一個辭職嘅理由，而今次選擇留喺3號碼頭嘅，唔再係Oscar。

圖片來源：《後來的我們》

上回 ⏪

睇吓有咩好工啱你啦 👇🏼

成立於2010年，Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來，取代重視利益關係的傳統配對。在日本有超過30,000間公司使用Wantedly，每月活躍用戶達到120萬個。我們的服務已拓展至新加坡，現在更進駐香港！