✨ 嚟到都係想搵份好工姐，即刻click呢度睇吓有咩啱你啦！✨

喺文學院出身嘅Clarence，除咗寫字就好似冇乜其他技能，加上寫字喺呢個世界上都已經唔再算係一種技能嘅時候，呢一年佢轉咗三份工，今次呢份係copywriter。對佢嚟講，2018嘅代名詞係「苦難」，尤其是佢對上一份工，係一個冇權edit嘅editor，而唯一嘅好事，就係識咗佢而家嘅女朋友──Kitty。

Kitty事無大小都會同佢分擔，開心唔開心都好，所以Clarence一直都好感激識到佢，直至轉咗呢份工。

作為一個copywriter，每日閒閒地都要寫幾千字，諗到頭都爆。有時仲要幫手睇埋公司internal嘅文件，面對公司同啲客「九唔搭八」嘅要求，就好似咩：題材要爆但唔可以露骨、一個鐘之內要交到初稿、順便幫手剪埋條片咁，啲伏嘅出現基本上係「由外到內再由內去返外」。

亦都係因為呢份新工，佢差唔多每晚都要OT，屋企慢慢成為佢嘅酒店，返去沖個涼，過晚夜咁。莫講話見Kitty，佢同「周公」嘅關係都疏遠咗好多。

「點呀你今日忙唔忙呀？今晚一齊食飯？」Kitty問。

喺office又要寫嘢，又要覆message，又唔可以畀阿姐知道，Clarence一定會開住個Web Whatsapp喺角落頭。

「忙到傻呀，阿姐都痴線，成日都以為啲字好似變出嚟咁，唔洗諗咩大佬。Sorry呀，今晚真係firm你唔到…」Clarence一個command + tab就開返個Word出嚟遮返住，然後就繼續幫公司譯個annual report。

「咁呀…唔緊要啦，我反正都有嘢做要OT，睇下等唔等到你囉。加油啦做嘢。」Kitty把口雖然係咁講，但其實個心有啲唔舒服。

Clarence返新工嘅呢一個月，佢地嘅見面次數由一星期幾次，大幅跌到去一個月幾次，跌得仲勁過恆指。

有人會覺得呢個係適應期，又有人會覺得佢地已經唔適合喺埋一齊，但Clarence冇時間諗呢啲嘢，就算收咗工嘅佢，都一樣會諗公司嘢，因為「度橋」無分地域時區，一日你未訓著，一日你都可以諗，加上好多時都要第二朝就返去present，所以佢根本冇得揀。

「就嚟十點啦喎，你走得未呀？食咗嘢未？」Kitty企咗喺佢公司樓下Whatsapp問。

「咩都未呀，做埋少少嘢先走，你呢？仲未返屋企？」Clarence望住個mon，啲眼水飆到好似滴咗眼藥水咁。

「未呀，我都啱啱先做完嘢，買外賣畀你食好唔好？」Kitty一路打字個人就一路震，因為佢冇諗過原來天文台真係會準，原來真係會有冷鋒。

「算啦，你走先啦，我好攰唔想食啦，做埋嘢想快啲返屋企瞓。」Clarence已經連覆佢嘅心力都冇，淨係想盡快save咗個document佢然後就走。

但佢公司啲電腦廢到連開機都要等五分鐘，而上頭又會嫌你做嘢慢，到頭來咪又係硬食。

「其實我喺你樓下等緊你，我等埋你再一齊去食宵夜啦？」Kitty好想見佢一面，但佢唔知道，原來咁樣係會令人覺得吃力。

「…」當無言以對嘅時候，Clarence好多時都會打省略號，因為咁樣唔係「藍tick」人之餘，自己又可以畀個腦休息一下，咩都唔駛諗。

「算啦都唔啱，好攰啦我。」Kitty拋低咗一句，然後慢慢踱步去上環地鐵站。佢覺得自己喺呢段關係裡面已經等得太耐。

「你諗清楚啦？」Clarence問。

圖片來源：《那些年，我們一起追的女孩》

下回⏩

睇吓有咩好工啱你啦 👇🏼

成立於2010年，Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來，取代重視利益關係的傳統配對。在日本有超過30,000間公司使用Wantedly，每月活躍用戶達到120萬個。我們的服務已拓展至新加坡，現在更進駐香港！