1
/
5

尋開心教學Webinar總結

撰文:香港賽馬會慈善信託基金

如果大家有留意開Wantedly,相信都會見到我哋同PROcruit C 專業創未來計劃一齊搞嘅「尋開心」教學呢個webinar,但小編亦都知你哋呢排忙住chur project忙考試,可能miss咗,所以筆者就喺呢度交低個總結畀大家追返post!

「每個人對開心嘅定義唔同」

研討會一開始,Wantedly Hong Kong嘅掌門人Lincoln就畀咗兩條熱身問題比參加者思考:學歷同工作嘅關係;工作成功同開心嘅關係,去引入討論理想工作嘅定義。如果你依一刻唔知自己想搵咩工,唔知下一步點行的話,you are not alone,Lincoln話呢個問題好多人係唔同人生階段都面對緊。

對每個人嚟講,理想工作分別可以係搵到好多錢、改變到個社會、見到自己影響力、搵到自己嘅價值等等,但正所謂「人無完人」,呢個世界上所謂完美嘅工作可能佔1%都冇。而時下年輕人(包括筆者)好多時對於「理想工作」嘅定義都唔再純粹係錢咁簡單,而係在於工作上畀到啲咩滿足感自己,畢竟返工嘅時間多過你返屋企,所以Lincoln就好強調一樣嘢:「大家要首先認清究竟一份點樣嘅工作會畀到快樂自己,點先搵到一份有意義既工。」

「讀咩科≠做邊行」

好多時大家都會畀自己嘅學科局限咗自己嘅職業,例如讀chem就會去做lab或者老師,但Lincoln就用自身例子去否定呢個stereotype:「我本身讀biotech出身,但我都唔係做緊biotech相關嘅工作。」

而筆者都有朋友係讀geography同讀chemistry畢業,但兩個而家都係做緊銀行,所以呢啲情況比比皆是。

因此大家係唔應該畀自己學歷限制自己可以做咩。當講到搵工嘅過程,Lincoln就用咗GPS同藏寶圖嚟做個比喻。搵工嘅過程唔似係用一個GPS,因為好少人係有咁清晰嘅方向知道自己去緊邊。反而一個理想嘅搵工狀態,係需要了解自己價值觀,咁你就會好似攞住張藏寶圖,有個大概方向再去探索。

再講白啲姐係點呢?即係當你張藏寶圖上面有唔同嘅job function、industries等等,然後再慢慢探索吓自己究竟鍾意做啲咩,當你搵到大概個area之後,再慢慢喺嗰個role/industry發展一條屬於自己嘅career path。

Extrinsic Motivation vs. Intrinsic Motivation

至於點樣開始畫呢張藏寶圖呢,Lincoln就話要搞清楚自己同份工嘅extrinsic同intrinsic motivation,字面譯就係外在同內在動機。Extrinsic嘅例子可以係人工、福利、舒舒服服;而Intrinsic嘅例子可以係做到自己想做嘅嘢、做嘅嘢幫到人,甚至帶到正面影響畀社會等。

當大家開始畫呢張藏寶圖嘅時候,首先要做嘅就係諗吓究竟乜嘢對自己嚟講係最重要,然後再去睇吓咩工種或者行業會滿足到你認為最重要嘅values。(如果大家想即場test吓嘅話可以去呢條link㗎~)

當你畫到張藏寶圖出嚟之後,咁你就要做功課啦:究竟咩行業會fit自己呢?邊個role係畀到呢樣嘢你呢?究竟係大公司、startup、NGO定還是係空餘時間做義工先有嘅呢?

邊個可以幫我搵到自己條路呢?

Lincoln 做完分享之後,就邀請咗幾位參加咗PROcruit C 專業創未來計劃嘅trainees去分享下佢地嘅心路歷程,講下呢個計劃點樣幫到佢哋開展自己職業生涯。

原本讀engineering畢業嘅Hayley就話覺得呢個計劃嘅僱主真係好好:「我初初入職嗰陣都擔心跟唔到公司嘅步伐,但公司好願意畀時間新人去適應環境,PROcruit C又會畀好多機會同埋training,幫我去融入工作環境同埋建立自己嘅career path。」Hayley仲話喺入嚟而家間公司做fitness app之前,已經先後見過5、6間公司,最後先決定入而家呢間公司,係深思熟慮嘅決定。

至於讀sport coaching嘅Janice就話PROcruit C俾到一個機會佢:「因為個疫情令到我哋本身呢行好難去教班甚至見工,但呢個計劃唔單只畀到好多選擇我,啲公司又唔會太介意你有冇相關嘅經驗,就真係睇你有冇心去做,為社會作出貢獻。」

而家做緊Marketing and CSR Assistant嘅阿Wing就話當初報PROcruit C係希望呢個計劃可以提供一個更適合嘅工作環境比佢,仲話個programme真係好全面:「除咗一開始我已經有好多機會接觸更多唔同類型嘅公司之外,喺見工嘅階段已經可以對間公司有更深入嘅了解,期間仲會有好多training,例如好多唔同職場嘅溝通技巧,而呢啲技巧都可以應用返喺工作上面。」

同樣做緊CSR嘢嘅Andy,就覺得呢個計劃令佢知道stay hungry,stay foolish嘅重要性,並寄語參加webinar嘅觀眾要揀份自己鍾意同真正care about嘅工。

講咗咁耐,其實筆者都只係畀另一條路大家選擇,因為今時今日搵工唔再好似以前咁,而如果你係有心想make an impact,無論你係咩院校畢業、讀咩科都好,都可以參加PROcruit C 專業創未來計劃,加入唔同嘅公司從而改變呢個社會。

PROcruit C 專業創未來計劃係咩?

PROcruit C 專業創未來計劃- 由香港賽馬會慈善信託基金策動及捐助,係一個專門為畢業生而設嘅計劃。計劃為最近三年嘅畢業生提供一年嘅工作合約,幫助佢哋踏入社會,開展專業生涯。PROcruit C提供嘅幾百個工作崗位相當多元化,涵蓋文創、創科、商社及社健四個領域,而且工作內容都同社會有密切關係,比一眾有心嘅年輕人機會去發揮以人為本精神為社會帶來正面改變,幫助受疫情影響嘅社區復原。PROcruit C相對一般就業計劃全面,除咗提供工作機會之外,仲會有職前訓練營,在職專業輔導,同幫助畢業生建立朋輩網絡,令fresh grad可以返工之前了解職場運作同收集行業資訊,確保佢哋可以順利從學校過渡職場。另一個特別之處在於,PROcruit C 標明工作經驗同學歷並非唯一招聘取缺因素,反而參加者嘅價值觀、態度、技能與知識 (VASK)先係僱主重視嘅價值,所以即使白紙一張,無工作經驗嘅fresh grad都歡迎報名。如果你係一個迷惘嘅畢業生,未知將來嘅路應該點行,可以試下參加PROcruit C呢個自我探索的歷程,等佢哋助你一臂之力發掘你嘅的價值取向同興趣人生態度,踏出你嘅職場第一步。

Wantedly, Inc. (Hong Kong)的招募
2 Likes
2 Likes
如果這篇文章引起了你的興趣,歡迎你到訪公司了解更多!