1
/
5

【Wantedly公司推介】廣告狂人KK Tsang:用高市價兩成嘅人工請人!

思考之必要:專訪The Bees Group創辦人曾錦強(KK Tsang)

做過廣告界嘅都一定有聽過曾錦強 (KK Tsang) 呢個名,而佢所創立嘅The Bees Group更加係好多人夢寐以求嘅公司。點解入The Bees?因為有「變態」福利囉:想買書?公司畀啦;想睇show?入公數啦。咁樣都未夠?The Bees仲會將3分1嘅盈利畀員工做bonus,今次就等筆者問吓The Bees創辦人KK點解會咁痴線!

▲留意返,KK做緊訪問嘅時候同時簽緊九萬幾份文件……

人才之必要

廣告呢行成日都畀人一個「工時長、人工低」嘅印象,所以有啲廣告公司嘅員工流失率係接近100%。但KK就有另一個睇法:「其實做廣告人工相比其他行業唔算差㗎,起碼The Bees唔會太刻薄啲員工先,我哋員工嘅薪酬比同行高大約10%至20%左右。因為我哋認為人才係呢一行嘅最重要嘅資產。我只能夠話呢行嘅人工個range可以好闊,做得好同埋做得唔好嘅待遇係可以差好遠。」

既然咁多人都(因為啲福利)想入The Bees,咁KK揀員工、partner嗰陣有冇一套特別嘅哲學呢?KK:「首先人品唔可以太差,加入我哋個集團即係要同員工一齊分享成果,某程度上即係佢願意犧牲自己嘅一部分去成就他人,有呢個特質嘅話人品唔會差得去邊。」

咁又點睇得出對方人品好唔好?KK就笑住咁講:「冇㗎,都係靠直覺,主要係靠集團嘅理念帶動。至於佢哋係真心buy我呢一套抑或純粹想討好我,其實傾計嗰陣係感受到,呢啲嘢冇得呃嘅。」

咁KK自己嘅人品又點呢?以疫情為例啦,佢唔單只冇cut到員工嘅福利,反而仲將一萬蚊work from home allowance畀咗一班同事:「啲員工喺屋企做嘢,變相佢哋屋企嘅燈油火蠟開支都多咗,printer墨、紙巾樣樣都要錢,咁畀返allowance佢哋都非常合理。」見到KK對員工咁爽手,就知佢有幾重視人才啦。

但你重視人嘅同時,人哋又會唔會重視你又係另一回事,KK就講吓以前嘅個別事件:「曾經有兩間公司喺The Bees度獨立咗出嚟,其中一間公司係出版社,業務上同我哋唔太相似,而且集團嘅管理費對佢哋嚟講係頗大嘅負擔,假如佢哋獨立運作嘅話經營上其實會再輕鬆啲,於是我就提出完咗個partnership啦。當然我哋係『和平分手』嘅,而之前投資落去嘅資金我哋都冇收返。」筆者聽完都想搵KK投資吓喺自己身上……

▲KK揀人咁有一手,唔怪得The Bees絕大部分嘅partnership都「金槍不倒」啦。

迷惘之必要

好多人啱啱畢業嘅時候都會好lost,唔知自己應該做啲咩。KK話佢都經歷過呢種迷失嘅狀態:「其實我啱啱畢業嗰陣係傾向想做market research多啲,但搵極都搵唔到類似嘅工作。」

至於點解會變咗入廣告呢一行呢?KK話自己就好似被選中嘅小孩咁:「當時我抱住試吓嘅心態,只係寄咗一份CV去一間廣告公司,點知咁就入咗行啦。仲要喺正式返工之前,已經畀另一間廣告公司挖角,所以我諗廣告呢行都幾鍾意我。」

KK覺得只要肯keep住去試,總會行到屬於自己嗰條路:「如果心中已經有個目標,知道自己想搵咩類型嘅工作嘅話就即管去試啦!但萬一努力咗都搵唔到,咁可以open啲去搵其他機會,趁自己仲有本錢就做多啲唔同嘅嘗試啦。」KK仲用咗Steve Jobs嘅一句說話補充:「You can’t connect the dots looking forward; you can only connect them looking backwards。」所以只要過咗嗰個迷惘嘅階段,大家都一定會發現所有經歷都有佢哋嘅意義。

睇到呢度,相信各位都會對廣告呢一行有興趣,咁做廣告人有啲咩必要條件?KK Tsang:「始終呢一行係創意產業,做廣告必須有嘅就係好奇心。另外就係要對廣告有熱誠喇,啱啱都有講過呢一行嘅工時相對長啲,所以真係要好熱衷於做廣告先可以長遠行落去。」

如果唔係讀相關major又有冇機會做廣告人呢?KK就話學歷並唔係必要嘅嘢:「呢一行唔係太睇重呢一點,讀咩科甚至有冇讀大學都唔係我哋嘅著眼點,我哋有個partner都唔係大學畢業,但佢喺呢行都發展得好好㗎。」佢仲話只要有心做廣告人,呢個行業係一定會畀機會你㗎!

▲筆者都想office有咁大隻pepe……(圖右為員工書櫃,筆者都想要呀……)

人工之必要

打工仔畀HR壓價就一定㗎啦,但KK就覺得一開始做嘢唔好太介懷人工嘅高低,咁筆者就好奇,到底去到咩階段先至去睇重呢一樣嘢呢?KK就就咁講:「只要你做得好,個market最終都可以畀返應有同合理嘅人工你。以我自己做例子啦,我自己由第一份工到最後一份工都冇拗過價錢,當然有試過畀人underpay,但最多份工都係做2、3年,如果你係做到嘢,一定會有更好嘅offer搵你。」

咁萬一發現自己嘅人工below market rate咁又點算呢?

「市場上會有競爭㗎嘛,一間公司無辦法一直刻薄你。如果呢間公司畀唔到你想要嘅人工,出面自然就會有更好嘅機會等緊你,到時你就有bargining power同老細negotiate。留低抑或離開,選擇會喺你自己手上。」

▲講到去留,KK都變得更加語重深長

離開之必要

除咗未搵到自己條路,最近年輕人都多咗一個難題要面對,到底留低喺香港定係去外國搵更好嘅出路呢?KK就話決定離開之前要認真考慮,自己接唔接受到未來條career path將會更加難行:

「無可否認香港各方面都有倒退嘅跡象,但目前喺香港嘅機會仍然比起其他國家多。以我喺外資公司做咗廿幾年嘅經驗嚟睇,其實亞洲人同外國人嘅地位係點都有啲差別,如果想喺西方職場上以亞洲人嘅身份出人頭地嘅話,你一定要付出更多effort。」

無論係職場定還是香港,「去留」呢個課題永遠都會存在,當然前者可以理性啲去思考,而目前真正嘅難題其實係後者。筆者嚟緊又有朋友帶埋個女出走英國,為嘅都只係想小朋友有個比較好嘅將來。呢個訪問雖然唔會畀到一個結論大家,但願幫到各位喺亂流下思考將來嘅路,同時做到自己想做嘅事。

後記:正如一開始都講過,The Bees會sponsor員工買多啲書睇,所以當日筆者喺佢哋個office發現周圍都擺咗唔少好書,而KK就向大家推介《Range》呢本書,主要講通才同專才嘅前景有咩分別,睇完之後對自己未來嘅發展方向或者會有更清晰嘅諗法:「AI呢項技術一直發展緊,越係專業嘅嘢越容易被AI取代,但有一樣嘢係AI唔會取替到,就係人類獨有嘅創造力同埋人際關係。未來大趨勢就係要融合一啲完全唔同範疇嘅嘢,再賦予一個新嘅生命畀佢哋,所以而家嘅職場同埋世界會需要通才多過專才,識得越多唔同範疇嘅嘢就越有優勢。」大家如果對前路仲迷惘緊嘅話就咩都試吓啦,慢慢就會摸索到自己想行嘅路㗎啦!
9 Likes
9 Likes